Жюреклеге кюн тийдире жашайса

Отарланы Омаргъа


Журтубузгъа саугъа болду ауазынг,
Къанат бере халкъыбызны жырына.
Сен жырлайса, жюрекле да — тап-таза,
Биз фахмунгда хар кюн сайын жылына.
Жерибизни тилсиз тургъан ташыны
Тили ачылгъан кибик, алай жырлайса.
Акъмангылай Минги тауну башыны
Бийиклигин кийип, алай жырлайса.
Къарачайны, Малкъарны да ийнагъы,
Ёнюнг бла кётюргенсе халкъынгы.
Жыры барны - жолу бар деп ийнана,
Сен ёлюмсюз эталгъанса атынгы.
Сен жырласанг - арбазыбыз жарыйды,
Юйюбюзге игиликле келгенча.
Санга дери жырлагъанла бары да
Ауазларын бир кесинге бергенча.
Жюреклеге кюн тийдире жашайса,
Умутларын толтураса минглени.
Энди, Омар, сен халкъ жыргъа ушайса,
Ол жырны уа айтады ёз миллетинг.

Созайланы Ахмат

Халкъ жырчыбыз

Не жарыкъды жырчы Омарны арбазы!
Къалай ариу эштиледи ауазы,
Къулакъланы бир хычыуун ийнакълай,
Таза кёкден Аллах ийген жарыкълай.
Омар жырлай, халкъ этеди эжиуюн,
Ким биледи, кимге иер кезиуюн.
Ёмюрлени ауазлары келелле
Ауазында, тау юйлеге кирелле,
Биз кёрмеген нартланы да уята,
Жаныбызны къууандыра, сарната.
Ёню бла жан кийире сёзлеге,
Терсни сёге, махтау сала тюзлеге,
Омар жырлайд Отарланы арбазда
Аллах анга энчи берген ауазда.
Къанатлыла анга эжиу этелле,
Ауазын да узакълагъа элтелле.
Эжиу эте барадыла суула да,
Сейирсинип тынгылайла буула да.
Ай да, тохтап, къулакъ салып къарайды,
Къарт анам а къаллай насып сынайды.
Бир къууана, бир а ачый жиляй

Омар айтхан нарт жырлагъа тынгылай,
Къыш кюнюнде келген суна анга жай.
Жырла Омар, сен жырласанг, арбазда,
Тюркде, Арабда эрттен, жассы намазда
Эштилирча жырынг, жюрек жылыта.
Жырла, сенсе жырчылагъа тамата.
Мен а санга эжиу эте билалсам,
Макъамлагъа ёлмез сёзле салалсам,
Гирхожанда биз жюрюучю орамда,
Биз кетгенде, биз жашагъан заманда
Жырыбызны къара ырхы элталмаз,
Къара кюч бизге узалып жеталмаз.
Айт, айт, Омар, халкъыбызны жырларын,
Кенгнге ача тау жырланы жолларын.
Сюе болсанг, кючню бирге салайыкъ,
Къураялсакъ, аллай жырла къурайыкъ,
Жыр макъамы жер-жерлеге жетерча,
Тау жырлагъа дуния эжиу этерча.

Зумакъулланы Танзиля,
Къабарты-Малкъарны халкъ поэти,
Россей Федерацияны Къырал саугъасыны лауреаты

Контакты

Напишите нам
assia big